Riciklimi është përgjegjësi personale. Si qytetarë globalë, ne kemi detyrim të mbrojmë mjedisin për brezat e ardhshëm dhe të sigurojmë që mbetjet të riciklohen siç duhet. Hedhja dhe klasifikimi i duhur i lëndëve të riciklueshme, si letra, qelqi, plastika dhe alumini mund të ndihmojë në krijimin e një bote më të pastër dhe t’i ndihmojë njerëzit të bëhen më të ndërgjegjshëm ndaj mjedisit. Plastika është një material i gjithanshëm, i cili na ka dhënë shumë përfitime. Sidoqoftë, cikli i jetës së pjesëve plastike nuk përfundon kur futet në koshin e plehrave ose në koshin e riciklimit.
Akti i riciklimit të plastikës mund të bëjë një ndryshim të konsiderueshëm dhe është thelbësore që konsumatorët të kuptojnë efektin pozitiv të riciklimit në aspektin mjedisor dhe ekonomik. Me një qasje të përshtatshme të riciklimit të plastikës, bizneset mund të reduktojnë prodhimin e mbetjeve të rrezikshme, të shkurtojnë shpenzimet për menaxhimin e mbetjeve dhe të gjenerojnë fitime duke shitur produkte plastike të ricikluara të cilat gradualisht po fitojnë kërkesë në tregje të ndryshme. Roli i konsumatorit është marrja e përgjegjësisë personale për kostot mjedisore dhe pasojat e asaj që ble dhe përdor.
Përqafimi i qasjes “Zero Mbetje” ka të bëjë fillimisht me parandalimin e mbetjeve – për të reduktuar dhe ripërdorur sa më shumë që të jetë e mundur produktet përpara se të blihen të reja, më pas me riciklimin dhe kompostimin.
Si mund të kontribuojë një qytetar:
Hiqni dorë nga qeset plastike. Një qese plastike zakonisht mund të përdoret për vetëm 30 minuta, por do të duhen 500 vite për t’u dekompozuar. Plastika është rezistente dhe ka lakueshmëri të dukshme, për këtë arsye plastika ka arritur praktikisht nivele aplikimi ne çdo fushë. Biodegradimi që i bëhet plastikes i duhet 500 deri në 1000 vjet.
Shmangni shishet plastike. Investoni në një shishe uji të riciklueshme. Në mbarë botën, gati një milion shishe plastike pijesh shiten çdo minutë.
Shmangni ambalazhet plastike. Shmangni produktet e veshura me plastikë.
Blini me përgjegjësi.
Zgjidhni artikuj që janë bërë me përmbajtje të ricikluar.
Blini shërbime dhe aktivitete në vend të të mirave materiale.
Blini prodhimet vendase në tregjet e fermerëve sa herë që është e mundur.
Bleni produkte vendase për të ulur kostot e transportit.
Behuni pjesë e fushatave sensibilizuese në kuader të reduktimit të plastikës dhe mbështësni legjislacionet përkatëse
Sigurohuni që edukimi personal i riciklimit të jetë një model për tu ndejkur nga komuniteti ku jetoni dhe përfshini në ndjekjen e këtij modeli sa më shumë njerëz
Marrja pjesë në sistemet e mbledhjes, riciklimit, rikuperimit dhe depozitimit të mbetjeve shtëpiake, sipas rregullave dhe programeve të bashkive
Burimi
*Dokumenti i politikave strategjike dhe plani kombëtar i menaxhimit të integruar të mbetjeve, 2020–2035
Ky artikull u realizua në kuadër të projektit “Riciklimi i Plastikës para se të kthehet në Mbetje”, i mbështur nga LevizAlbania, një projekt i Agjencisë Zvicerane për Zhvillim dhe Bashkëpunim, SDC.
By: Eljona Meleq
