krenari korçare
Kujtojmë sot, në 123-vjetorin e lindjes, Artistin e Merituar Mihal Ciko (1902-1986, një nga figurat më të shquara të brezit të parë të muzikës dhe artit operistik shqiptar.
Lindur më 29 gusht 1902 në Korçë, ai u rrit me dashurinë për artin. Familja e tij emigroi herët në Rumani, ku ai u përfshi në shoqërinë artistike “Liria” në Bukuresht si korist, aktor e më pas dirigjent. Studimet i kreu në Konservatorin “Giuseppe Verdi” në Milano, ku u diplomua me rezultate të shkëlqyera si bariton.
Debutimin e parë e pati në vitin 1926 me operat Cavalleria Rusticana dhe Pagliacci. Në vitin 1929 fitoi çmimin e parë në Konkursin Ndërkombëtar të Këngës Popullore në Milano. Deri në vitin 1942 interpretoi me sukses në skena të Italisë, Rumanisë e vendeve të tjera.
Me kthimin në atdhe, ai u bë një nga shtyllat e artit muzikor shqiptar, duke bashkëpunuar me emra si Tefta Tashko, Marie Kraja, Jorgjia Truja, Kristaq Antoniu, Lola Gjoka. Ishte ndër themeluesit e orkestrës së parë simfonike pranë Radio Tiranës, si dhe i pari regjisor i një operete shqiptare, “Agimi” të Kristo Konos.
Mihal Ciko është pedagogu i parë i kantos në Liceun Artistik “Jordan Misja”, si dhe ndër mësuesit e parë në Konservatorin e Tiranës, ku formoi brezin e artë të kantos shqiptare, mes tyre Gaqo Çako dhe Ramiz Kovaçi.
Si regjisor e solist, dha kontribut të vyer në skenën e parë të operës shqiptare, duke interpretuar në Rusalka, Nusja e Shitur, Cavalleria Rusticana e të tjera.
Për gjithë veprimtarinë e tij të pasur artistike e pedagogjike, Mihal Ciko u vlerësua me tituj e çmime, duke mbajtur me krenari titullin “Artist i Merituar”. (Na ishte dikur)
@NewsIn.Al
