“Çfarë të shihja kur erdha”, humbi djalin dhe bashkëshorten në aksident, dëshmia rrëqethëse e shqiptarit: Diçka po më tërhiqte në zemër…
GREQI- Një ngjarje e rëndë ka tronditur komunitetin shqiptar në Serres të Greqisë, ku një nënë 43-vjeçare dhe djali i saj 24-vjeçar humbën jetën pas një përplasjeje tragjike me një kamion.
Viktimat ishin nisur herët në mëngjes për në punë në zonën e Amfipolit, por udhëtimi i tyre përfundoi në tragjedi në aksin kombëtar Drama–Amfipoli, pranë Palaiokomisë.
Bashkëshorti i 43-vjeçares dhe babai i 24-vjeçarit ka rrëfyer momentet e fundit para se të mësonte lajmin e rëndë. Në një intervistë për ERTneës, ai tha se kishte tentuar t’i kontaktonte në telefon, por nuk mori përgjigje.
“U ngritën në orën 7:30 për të shkuar në Amfipoli për punë. Në orën 7:50 i telefonova në celular, por nuk ma hapën”, tregoi ai mes dhimbjes.
Sipas dëshmisë së tij, automjeti drejtohej nga djali 24-vjeçar, ndërsa nëna e tij ishte ulur në sediljen e pasagjerit.
Babai tregoi se nuk kishte dijeni për aksidentin derisa mbërriti në vendngjarje.
“Nuk e di, nuk kam asnjë ide. Tani i kam humbur të gjitha. Nuk më njoftuan. Diçka më tërhiqte në zemër. Pashë ambulancën dhe zjarrfikësen, i mora në telefon, por asgjë. Kur erdha këtu, çfarë të shihja? I humba të dy”, u shpreh ai i dëshpëruar.
Ndërkohë, autoritetet greke po hetojnë shkaqet e aksidentit. Një video e regjistruar nga telefoni i drejtuesit 56-vjeçar të kamionit ka kapur momentin e përplasjes së fuqishme.
Në pamje duket automjeti ku udhëtonin nëna dhe djali teksa, për arsye që ende nuk janë përcaktuar, kalon në korsinë e kundërt dhe përplaset kokë më kokë me kamionin.
Hetuesit po analizojnë gjurmët e frenimit dhe rrëshqitjes në asfalt për të përcaktuar nëse shkak i aksidentit ishte humbja e kontrollit të mjetit, ndonjë problem teknik apo një faktor tjetër.
Drejtuesi i kamionit, i cili ishte përfshirë në aksident, po merret gjithashtu në pyetje nga autoritetet, ndërsa vijojnë hetimet për zbardhjen e plotë të rrethanave të tragjedisë.
@NewsIn.Al
