Kupa e Botës në vëndin e miliarderëve, është më “sterilja” në historinë moderne/ Ilir Jano

Kupa e Botës në vëndin e miliarderëve, është më “sterilja” në historinë moderne…/ ilir jano

Milionat verbuese dhe rregullat imponuese, “ndalojnë” pulsin në tribunat e Katarit.
Kanë kaluar tashmë katër ditë dhe pak a shumë, ky është konkluzioni për atë që ne, si një shoqëri globale futbolldashëse, po marrim nga Kupa e Botës në Katar.
Sa më gjatë të vazhdojë, aq më shumë të bind se kjo është Kupa e Botës më e kontrolluar ndonjëherë.

Ndodh kryesisht sepse një pjesë e madhe e futbolldashësve dhe “dashamirësve” të Botërorit, të cilët udhëtojnë nga vendi në vend e nga kontinenti në kontinent për ta përjetuar atë, këtë herë nuk e kanë bërë… Kostoja shumë e lartë, numri i ndalimeve dhe ajo që përfaqëson Katari e kanë mbajtur publikun e futbollit dhe audiencën tradicionale të Kupës së Botës larg stadiumeve të ndërtuara mirë të Kupës së Botës 2022.
Skena e ngritur në Katar me hotelet me shumë yje, 22 mijë kamerat e policisë, ligjet në fuqi dhe ndalesat që sjellin, nuk është një skenë që fton tifozët tradicionalë të futbollit.
Fton turistë të pasur që bëjnë turne ditore dhe mes atraksioneve si mitingu i deveve dhe skifterët, vendosin një fushë futbolli për të bërë një selfie dhe për të shkruar “Isha edhe unë aty”…
Ajo që është ngritur në Katar është një Kupë Botërore në dhomën e ndenjes. Dhe dhomat e ndenjes nuk mund të krijojnë një “puls” futbolli.
Historia na ka treguar se çdo vend futbolli që është bombarduar nga turistë të pasur të planetit ka humbur pulsin dhe kulturën e tij vendase. Kështu ndodhi me shumicën e skuadrave të mëdha evropiane, tani po ndodh me Kupën e Botës. Tani, kur eksperienca e shikimit të tre ndeshjeve të skuadrës vendase kushton një pasuri, stadiumet e Katarit i ndjekin vetëm ata që kanë mundësi…dhe me ta, kur janë vetëm, tribuna nuk merr “puls”.

Festivali shumëkombëtar në tribuna ka qenë gjithmonë një element kryesor i identitetit të Kupës së Botës – ka qenë gjithmonë një arsye shtesë për të parë dhe shijuar Kupën e Botës. Ky element u hoq dhe për këtë tribunat janë bërë më indiferente se kurrë.
Me sa duket e gjithë kjo e lë FIFA-n të pashqetësuar – në fund të fundit, ajo nuk shqetësohet për një mori pasojash të vendimeve të saj që kanë ndryshuar natyrën e Kupës së Botës. Prandaj edhe sot, ndërsa jemi ende në ndeshjet e para të fazës së grupeve, nuk ka më arsye të shpresojmë se kjo që po shohim nuk do të jetë Botërori më steril që kemi parë ndonjëherë.
Me sa duket i vetmi “litar” shpëtimi për Kupën e Botës është vetë futbolli – pra, ta mbajmë lojën sa më shumë nga elementët që emocionojnë shoqërinë globale të futbolldashësve. Tani për tani futbolli po e shpëton Botërorin, përkatësisht surprizat e krijuara nga Arabia Saudite dhe Japonia. Nëse FIFA gjen një mënyrë për të përjashtuar edhe surprizat…

Nga I.Jano

@NewsIn.Al