Zhimin Qian, e njohur edhe si Yandi Zhang, është dënuar pas një hetimi ndërkombëtar shtatëvjeçar për pastrim parash që çoi në sekuestrimin më të madh të kriptomonedhave në botë, me vlerë më shumë se 5 miliardë paund (6.7 miliardë dollarë).

Sipas Policisë Metropolitane, nga viti 2014 deri në vitin 2017 ai udhëhoqi një mashtrim në shkallë të gjerë në Kinë, duke mashtruar më shumë se 128,000 qytetarë. Paratë u konvertuan në bitcoin dhe u ruajtën për t’i shpëtuar kontrollit të autoriteteve. Policia Metropolitane njoftoi se kishte gjetur 61,000 bitcoin me vlerë më shumë se 5 miliardë paund (5.7 miliardë euro).

Sipas një raporti të BBC-së, 47-vjeçarja u largua nga Kina me dokumente të falsifikuara dhe u vendos në Britani, ku u përpoq të pastronte fondet e vjedhura përmes blerjes së pasurive të paluajtshme.

Pas pesë vitesh, ajo u arrestua dhe u përball me një hetim shumëvjeçar që filloi në vitin 2018, pas informacioneve për transferta të dyshimta fondesh.

Në Kinë, Qian e promovoi skemën e saj si një mundësi për ta transformuar vendin në një qendër globale financiare dhe teknologjike. Përmes një kompanie fiktive, ajo premtoi dividentë të përditshëm dhe fitime të garantuara. Viktimat përfshinin biznesmenë, punonjës bankash dhe anëtarë të gjyqësorit.

Mediat kineze e quanin atë “perëndesha e pasurisë”, ndërsa investitorët – shumë prej tyre drejtues të mesëm dhe të lartë, madje edhe bankierë ose gjyqtarë – investuan qindra mijëra deri në dhjetëra miliona juanë. Fjala gojë më gojë përhapej shpesh, me miqtë dhe të afërmit që bindnin njëri-tjetrin të merrnin pjesë.

Rasti përfshin gjithashtu Jian Wen, një ish-punonjës në një restorant kinez me porosi në Londër, i cili ndihmoi në pastrimin e të ardhurave. Wen, 44 vjeç, u dënua vitin e kaluar me gjashtë vjet e tetë muaj.

Brenda një kohe të shkurtër, ai la apartamentin sipër restorantit për në një vilë luksoze në veri të Londrës, ndërsa bleu edhe dy prona në Dubai me vlerë më shumë se 500,000 £.

Edhe pse avokati i Qian argumentoi se “rritja e vlerës së kriptovalutave është e mjaftueshme për të kompensuar investitorët”, çështja mbetet e hapur: ka informacione se qeveria britanike mund të kërkojë të mbajë shumat e sekuestruara, siç raportohet nga BBC.

Për autoritetet britanike, ky rast është një shembull se si kriptovalutat po përdoren gjithnjë e më shumë nga organizatat kriminale për të fshehur ose transferuar të ardhura.

“Ky dënim shënon kulmin e një hetimi shumëvjeçar dhe kompleks”, tha Will Lin, kreu i Njësisë së Krimit Financiar dhe Krimit Kibernetik të Policisë Metropolitane. Bashkëpunimi me autoritetet kineze po vazhdon ndërsa hetimi mbetet i hapur.

Qian mbetet në paraburgim dhe pret dënimin e saj, i cili do të përcaktohet pasi të përfundojë gjyqi i bashkëpunëtorëve të saj.