SARANDË — Vrasja e Artan Murtajt (i njohur si “Tani i Ruzhdiut”) dhe plagosja e një këmbësori gjatë atentatit të së dielës kanë vënë në lëvizje drejtuesit më të lartë të Policisë së Shtetit.
Një ditë pas ngjarjes, Drejtori i Përgjithshëm i Policisë së Shtetit ka urdhëruar krijimin e një grupi të posaçëm me ekspertë nga Departamenti i Policisë Kriminale dhe Departamenti i Sigurisë Publike, për të kryer një rivlerësim të thelluar të situatës kriminale në rrethin e Sarandës, në bashkëpunim me Drejtorinë Vendore të Policisë Vlorë.
Paralelisht, po kryhet një analizë e performancës për të gjithë zinxhirin drejtues dhe efektivët e Komisariatit të Policisë Sarandë, mbi bazën e së cilës do të merren masa organizative dhe strukturore.
Në njoftimin zyrtar mbi masat e ndërmarra, Policia e Shtetit bën me dije:
“Drejtori i Përgjithshëm i Policisë së Shtetit ka urdhëruar ngritjen e një grupi të posaçëm, me ekspertët më të mirë të Departamentit të Policisë Kriminale dhe të Departamentit të Sigurisë Publike, me qëllim kryerjen e një rivlerësimi të plotë dhe të thelluar të situatës kriminale në rrethin e Sarandës, në bashkëpunim me DVP Vlorë, stafin drejtues të Komisariatit të Policisë Sarandë dhe strukturat e tij hetimore. Gjithashtu, po kryhet një rivlerësim i performancës së të gjithë zinxhirit drejtues të Komisariatit të Policisë Sarandë, si dhe i efektivëve të rolit bazë dhe të rolit të parë drejtues. Në bazë të performancës së tyre, do të ndërmerren veprimet e duhura. Paralelisht, po punohet për krijimin e strukturave të specializuara për hetimin e krimeve të rënda dhe luftën kundër krimit të organizuar, si dhe për garantimin e mbështetjes së tyre me bazën e nevojshme logjistike. Ndërkohë, në lidhje me ngjarjen, grupi hetimor, nën drejtimin e Prokurorisë, po vijon veprimet intensive hetimore, të koordinuara ngushtësisht me veprimet operacionale të shërbimeve të Policisë në terren. Policia e Shtetit mbetet e angazhuar maksimalisht për zbardhjen e plotë të ngjarjes, identifikimin dhe nxjerrjen përpara drejtësisë të autorëve, si dhe për forcimin e mëtejshëm të sigurisë në territorin e Sarandës dhe në të gjithë vendin.”
Veprimet hetimore në terren po vijojnë nën drejtimin e prokurorisë për identifikimin dhe kapjen e autorëve të përfshirë në ngjarje.
@NewsIn.Al
