Kryetari i LAOS-it dhe bashkëshortja e tij mes të arrestuarve në një hetim për një rrjet kompanish dhe borxhe ndaj shtetit dhe e-EFKA-së
Një operacion i madh i autoriteteve greke ka çuar në arrestimin e Filippos Kambouris, presidentit të partisë LAOS dhe prezantues televiziv, i cili dyshohet se kishte rol drejtues në një organizatë të hetuar për mashtrim financiar ndaj shtetit grek dhe fondit të sigurimeve shoqërore e-EFKA. Mes të arrestuarve është edhe bashkëshortja e tij. Në total janë arrestuar 11 persona.
Sipas hetimeve, grupi dyshohet se përdorte një rrjet kompanish dhe persona që shfaqeshin formalisht si pronarë ose administratorë, ndërsa detyrimet tatimore dhe kontributet e sigurimeve shoqërore mbeteshin të papaguara. Autoritetet po hetojnë gjithashtu përdorimin e kompanive fiktive dhe mënyrën se si aktivitetet e tyre kalonin nga një subjekt në tjetrin.
Dëmi i vlerësuar ndaj shtetit grek arrin në rreth 5.35 milionë euro, ndërsa dëmi i lidhur me e-EFKA-n vlerësohet mbi 1.5 milionë euro. Hetuesit kanë konstatuar gjithashtu tërheqje prej më shumë se 2 milionë eurosh nga llogaritë e kompanive të përfshira në hetim.
Gjatë kontrolleve në banesa, biznese, zyra kontabiliteti dhe kasaforta bankare, autoritetet raportuan sekuestrimin e 136.237 eurove cash, automjeteve, kartave bankare, dokumenteve dhe pajisjeve elektronike, si dhe një arme pneumatike.
Prokuroria ka ngritur akuza, sipas rastit, për drejtim ose pjesëmarrje në organizatë kriminale, mashtrim në dëm të shtetit, pastrim parash dhe shkelje të detyrimeve tatimore e të sigurimeve shoqërore. Të arrestuarit janë dërguar përpara autoriteteve gjyqësore për procedurat e mëtejshme.
Ndërkohë, Filippos Kambouris mohon akuzat dhe ka deklaruar se është i pafajshëm, ndërsa hetimi dhe procedurat gjyqësore do të përcaktojnë përgjegjësitë individuale të personave të përfshirë.
@Albania tv
