Dhe përgjigjet do t’i ruaj
Në një kuti shkrepse, i futa gjithë kujtimet e mia,
E mbylla atë brenda një valixhe ëndërrash,
Duke nxitur kureshtjen e çfarë do të sillte një nesër,
Nga të papriturat, mes rrahjesh të çrregullta zemrash!
Këmbëngul të zgjidh misterin e diçkaje ekstreme,
Ashtu si “imazhin” e padukshëm të një femre!
Ku e gjen forcën një nënë tek përballet me jetën,
Ku gjen fuqinë të sfidojë mes lindjes, dhe vdekjen?!
Po lulet, ku gjejnë aromën dhe ngjyrat, pyes veten?!
Po shpirti, çfarë ka të përbashkët me Yjet, me Qiellin?!
Po dhimbjen, ç’e lidh me buzëqeshjen, trishtimin, gëzimin?!
Po ty, çfarë të lidh me Hënën, me Zotin, me Diellin?!
Dhe përgjigjet do t’i ruaj si thesar në zemrën time,
Se askush nuk ka zbuluar të vërtetat e kësaj jete,
Është e bukur aventura, të kujdesesh për një tjetër,
Por më këndshëm dhe më mirë është kujdesi për vetveten!
Arben Petro Trebicka
@NewsIn.Al
