Gjeometria e qiellit
Mbi çatitë e kërrusura,
kompanjelë e minare
ngrihen si aksioma të gurta
përkundër diellit.
Prej shekujsh, guri lartësohet
e njeriu zbret nën dhe;
dy paralele që preken
në amshimin e premtuar.
Në oborret e tempujve
siluetat enden pa cak,
e koha, pa u ndier,
ua ngushton rrethin.
Nën lartësitë e kullave
hijet tona zgjaten,
sikur duan të mbërrijnë në varr
pas nesh.
Qielli s’ka qendër as skaj,
veç heshtjes që s’e masim dot;
kufijtë ia vëmë ne,
nga frika e pafundësisë.
Gjergj Zefi
@NewsIn.Al
