Gjobë dhe sekuestrim veglash muzikore. Nëse në qytete të tjera mund të “sekuestrohen” kallashë apo shkopinj bejzbolli, në Korçë “burgoset” kitara!
Të ndalohet sigurisht muzika e lartë dhe shqetësuese pas orës 24 00, por jo serenatat…
Ka aparate matëse për zhurmat dhe brenda qytetit askush nuk i do pas mesnate!
Nuk është faji i Korçës trashëgimia e serenatës, as dhe e korçarëve që këngët e tyre i quajtën sereNata, jo sereDita!
Me të ndaluar, pa të ndaluar ne do i këndojmë serenatat tona, duan apo nuk duan të tjerët!
Në Korçën e korçarëve serenatat ishin, janë dhe do të mbeten simbol i dashurisë….sa mund të ndalosh dashurinë, aq do ndalosh dhe kitarat të këndojnë mbrëmjeve në qytet!
Mbase, gjetja e “gjuhës” me pronarët për të kufizuar patjetër muzikën e lartë pas orarit të caktuar, do të ishte më e pranueshme…behari aq është në Korçë dhe biznesi që drejtojnë pa muzikë dështon.
Ja dhe njoftimi i DVP Korçë:
DVP Korçë/Vijojnë kontrollet intensive për parandalimin e ndotjes akustike në të gjithë qarkun.
Prishën qetësinë publike duke vendosur muzikë të lartë në ambientet e një lokali, procedohet penalisht pronari i lokalit dhe 3 muzikantë, të cilët ishin punësuar në mënyrë të paligjshme.
Sekuestrohen pajisjet që gjeneronin muzikën.
Shërbimet e Komisariatit të Policisë Korçë në bashkëpunim me Task Forcën si rezultat i kontrolleve gjatë natës, për parandalimin e shqetësimit të qytetarëve dhe pushuesve, nga ndotja akustike që është pasojë e muzikës së lartë në subjekte të ndryshme argëtimi, kanë konstatuar 1 rast të paligjshmërisë në këtë fushë.
Konkretisht në një lokal në lagjen nr. 4, Korçë, është konstatuar muzikë e lartë, në tejkalimin të përcaktimeve ligjore mbi nivelin e zhurmave.
Në vijim të veprimeve procedurale për këtë rast, specialistët për Hetimin e Krimeve të Komisariatit të Policisë Korçë referuan materialet në Prokurori ku nisi procedimi në gjendje të lirë, për shtetasit M. Z (pronari i lokalit), A. H; A. Zh. dhe M. Ç., muzikantë në këtë lokal, për veprën penale “Prishja e qetësisë publike”, kryer në bashkëpunim.
Gjithashtu gjatë verifikimeve të kryera rezultoi se tre muzikantët nuk ishin të deklaruar në skemën e sigurimeve shoqërore, si të punësuar në këtë lokal.
Në cilësinë e provës materiale u sekuestruan pajisjet që gjeneronin muzikën.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
Policia e Shtetit apelon për të gjithë administratorët dhe pronarët e lokaleve dhe hoteleve, që të zbatojnë me rigorozitet ligjin dhe rregullat në lidhje me ndotjen akustike, pasi në rast të konstatimit të paligjshmërive në këtë fushë, shërbimet e Policisë do të sekuestrojnë pajisjet që gjenerojnë muzikë dhe do të procedojnë sipas ligjit, shtetasit përgjegjës.
@NewsIn.Al
