Këtu në Ballkan: Nga Aleksandër Marku
NATO pret që Bullgaria të shpenzojë 1.88 miliardë dollarë ose 3.4 miliardë BGN për mbrojtjen këtë vit, sipas shifrave të publikuara për shpenzimet e vendeve anëtare të Aleancës për periudhën 2014-2023. Kjo përfaqëson 1.84% të Prodhimit të Brendshëm Bruto të vendit ballkanik.
Parashikimet thonë se PBB i Bullgarisë për vitin 2023 do të arrijë në 62 miliardë dollarë dhe për frymë – 9100 dollarë. NATO kërkon që të gjitha vendet anëtare të shpenzojnë të paktën 2% të Prodhimit të Brendshëm Bruto për mbrojtjen.
Nga 30 vendet e Aleancës Euroatlantike , 13 shpenzojnë një përqindje më të ulët të PBB-së sesa Bullgaria. Pavarësisht sulmit të Rusisë ndaj Ukrainës, shumë vende të NATO-s po rrisin shpenzimet e tyre të mbrojtjes me një ritëm shumë të ngadaltë. Vetëm 11 nga 30 vendet anëtare e kalojnë shifrën prej 2%. “Në Evropë, ky objektiv po përmbushet pothuajse ekskluzivisht vetëm nga vendet përgjatë kufirit lindor të NATO-s. Vendet anëtare në Perëndim po rrisin shpenzimet e tyre të mbrojtjes me kujdes,” thonë ekspertët ushtarakë.
Krahasuar me vitin 2021, Gjermania do të rrisë shpenzimet e saj me 0,1 pikë në 1,6% të prodhimit të saj ekonomik, duke përfshirë shpenzimet nga fondi special i vendit për Forcat e Armatosura Federale. Kjo e vendos Gjermaninë në vendin e 17-të nga 30 vende të NATO-s. Në terma absolutë, Gjermania nuk do të arrijë objektivin prej 2% me 17 miliardë euro më pak këtë vit, deficiti më i madh i çdo vendi anëtar.
Duke përjashtuar SHBA-në, vendet e NATO-s do të shpenzojnë mesatarisht 1.8% të prodhimit të tyre ekonomik për mbrojtjen në vitin 2023, një total prej 1.2 trilion euro.
Në vitin 2023, fqinji i Ukrainës, Polonia, do të arrijë shifrën më të madhe të shpenzimeve ushtarake me bazë PBB. Vendi ka pothuajse dyfishuar normën e tij në krahasim me vitin 2021, nga 2.2% në 4.3%, pra rreth 17 miliardë euro mbi objektivin 2%. Me 3.3%, në vendin e dytë vjen SHBA-ja, e ndjekur nga Greqia me 3.1%.
@NewsIn.Al
