Kujtime malli për vendlindjen…Fshati im është Menkulasi/ Nga Dritëro Agolli
“ Fshati im është Menkulasi , që shtrihet pranë bregut të lumit të Devollit. Kur isha i vogël , kishte shumë shelgje në brigjet e lumit dhe në mbrëmje e në mëngjes këndonin bilbilët me një zë të mrekullueshëm .
Matanë lumit kodrat ishin të mbushura me lajthi . Kodrat quhen edhe sot Poçrova, por nuk kanë as dushk dhe as lajthi , pasi janë shpyllëzuar. Në livadhet e këtyre kodrave ne fëmijët kullosnim lopët. Në lumë , kur vinte vera, laheshim vetë, i lanim edhe kuajt .
E di se çfarë bukurie është të lash kalin në lumë? Ai noton bashkë me ty, madje ngre lart mbi ujë këmbët e para dhe i përplas, duke ngritur stërkala . Kur vinte vjeshta , nëpër kodrat e Poçrovave ne mblidhnim lajthi dhe mbushnim torbat e leshta .
Pastaj vonë, në mbrëmje ktheheshim bashkë me lopët në shtëpi . Mua mbrëmjet më pëlqenin shumë , se vinte erë tymi shtëpie nga oxhakët, vinte erë gjalpi të djegur dhe herë-herë erë mishi .
Kur vinte erë mishi , unë gëzohesha se mendoja që në shtëpi kishin ardhur miq të largët , të cilët i kisha qejf kur kuvendonin dhe kur tregonin ngjarje nga krahinat e tjera , që unë nuk i dija dhe nuk u ngjanin ngjarjeve të fshatit tim …”
Dritëro Agolli
@NewsIn.Al
