Në një qytet si Pogradeci, ku fjala dhe kujtesa mbajnë ende peshë, emri i Dr. Ilir Shytës qëndron si një urë mes dijes dhe komunikimit publik. Pedagog në Universitetin “Fan S. Noli” në Korçë, pjesë e Departamentit të Gjuhës dhe Letërsisë, ai përfaqëson atë brez akademikësh që nuk janë mbyllur në auditorë, por kanë dalë në terren, në media, në debat publik, në jetën kulturore të qytetit.
I lindur në Pogradec dhe i formuar në Universitetin e Tiranës në degën Gjuhë-Letërsi, Shyta ka ndërtuar një profil të qëndrueshëm akademik, me një fokus të veçantë në letërsinë shqipe dhe studimet letrare. Doktoratura e tij mbi receptimin e poezisë së Lasgush Poradecit nuk është thjesht një punim shkencor, por një rikthim te rrënjët e identitetit kulturor të juglindjes, aty ku fjala poetike merr frymë bashkë me liqenin.
Në auditor, ai ka mbajtur mbi supe një gamë të gjerë disiplinash nga estetika dhe historia e mediave, te poezia dhe proza shqipe, duke ndikuar në formimin e brezave të rinj. Roli i tij si kryetar i Këshillit të Etikës dhe aktualisht në Bordin e Administrimit në universitet e vendos gjithashtu në një pozicion kyç për ruajtjen e standardeve akademike dhe integritetit profesional.
Por profili i Ilir Shytës nuk mbaron në botën akademike. Prej më shumë se 26 vitesh ai është i pranishëm në gazetari, në revista, gazeta, radio dhe televizion, duke ndërtuar një përvojë të gjatë dhe të qëndrueshme në fushën e medias. Si intervistues i shumë personaliteteve nga disiplina të ndryshme, ai ka ditur të sjellë në publik zëra dhe perspektiva të rëndësishme, ndërsa përmes kronikave të veçanta ka dokumentuar ngjarje dhe zhvillime, shpeshherë në periudha kritike për vendin. Realizues i disa filmave dokumentarë dhe reportazheve të gjata.
Ai mbetet një zë i njohur në gazetarinë lokale, i lidhur me median televizive dhe debatin publik, ku ka trajtuar çështje që lidhen me etikën e gazetarit dhe përgjegjësinë e fjalës. Si kryeredaktor dhe moderator në SOT7, ai ka qenë pjesë e përpjekjes për të ruajtur standardin e komunikimit publik në një kohë kur media shpesh lëkundet mes presionit dhe kompromisit.
Në jetën kulturore të Pogradecit, Shyta shfaqet si një figurë aktive, që nuk kufizohet vetëm në analizë, por edhe në promovim të vlerave lokale, autorëve dhe trashëgimisë letrare. Vlerësimi si një ndër “Personazhet e Vitit 2024” nga redaksia jonë, është një reflektim i kësaj pranie të vazhdueshme në jetën e komunitetit.
Në thelb, profili i tij mbetet i qartë, një pedagog që nuk harron qytetin, një gazetar që nuk e lehtëson fjalën dhe një studiues që e sheh letërsinë jo si luks, por si nevojë për të kuptuar veten. Në një kohë të zhurmshme, ai mbetet një prej atyre zërave që kërkojnë qetësinë e mendimit dhe peshën e fjalës së saktë.
@NewsIn.Al
