TIRANË- Një skemë e dyshuar mashtrimi ndaj sistemit të pagesave elektronike të Raiffeisen Bank është bërë objekt hetimi nga autoritetet shqiptare, pasi banka ka depozituar një kallëzim penal në Policinë e Shtetit.
Më 29 korrik, dy përfaqësues të bankës janë paraqitur në Drejtorinë e Përgjithshme të Policisë së Shtetit, ku kanë denoncuar një rast mashtrimi financiar. Sipas kallëzimit, dëmi nuk lidhet me një grabitje fizike apo me përfshirjen e punonjësve të bankës, por me shfrytëzimin e një dobësie të dyshuar në platformën e pagesave elektronike.
Sipas të dhënave që janë bërë pjesë e kallëzimit, më shumë se 40 persona dyshohet se kanë kryer tërheqje të përsëritura parash, kryesisht në shuma të vogla deri në 100 euro, edhe pse llogaritë nga të cilat kryheshin veprimet nuk kishin fonde të mjaftueshme.
Dëmi i raportuar nga banka llogaritet në rreth 200 mijë euro, ndërsa hetuesit nuk përjashtojnë mundësinë që shuma totale të jetë më e madhe pas verifikimeve të mëtejshme.
Si dyshohet se funksiononte skema
Në qendër të hetimit është vendosur Redjon Zaçi, i cili dyshohet se ka identifikuar një anomali në funksionimin e sistemit digjital të bankës.
Sipas dyshimeve të ngritura në kallëzim, gjatë një intervali të caktuar kohor, kryesisht gjatë orëve të vona të natës, sistemi lejonte nisjen e transfertave mes llogarive ose kartave pa kryer menjëherë kontrollin nëse llogaria burimore kishte fonde të mjaftueshme.
Kjo vonesë në verifikimin e bilancit dyshohet se krijonte mundësinë që paratë të transferoheshin dhe të tërhiqeshin përpara se sistemi të evidentonte mungesën e mbulimit financiar.
Hetuesit dyshojnë se pikërisht kjo dobësi teknike është përdorur në mënyrë të përsëritur për të realizuar dhjetëra transaksione.
Dyshohet për organizim me shumë llogari
Sipas materialeve të kallëzimit, Zaçi dyshohet se e ka ndarë informacionin mbi këtë problematikë me Eglind Mançjan, i cili, sipas hetuesve, kishte njohuri mbi funksionimin e sektorit financiar për shkak të eksperiencës së mëparshme në mikrofinancë.
Për të shmangur zbulimin, skema dyshohet se është ndërtuar duke përdorur një numër të madh llogarish bankare dhe duke shpërndarë tërheqjet në shuma të vogla.
Hetuesit dyshojnë se për hapjen e disa prej këtyre llogarive janë përdorur persona të tjerë, të cilët kanë vënë në dispozicion dokumentet e identifikimit kundrejt pagesave të vogla.
Një pjesë e parave dyshohet se u jepej personave që kryenin tërheqjet, ndërsa pjesa tjetër mendohet se përfundonte te organizatorët e skemës.
Banka aktivizoi kontrollet pas transaksioneve të pazakonta
Sipas kallëzimit, transaksionet e përsëritura dhe modelet e pazakonta të veprimeve financiare kanë ngritur dyshime dhe kanë aktivizuar mekanizmat e kontrollit të bankës.
Në dosjen e dorëzuar në polici janë përfshirë emrat e më shumë se 40 personave, për të cilët kërkohet verifikimi i rolit të tyre në këtë skemë të dyshuar.
Raiffeisen Bank pretendon se është viktimë e një mashtrimi të organizuar dhe ka kërkuar që personat përgjegjës të mbajnë përgjegjësi penale.
Deri tani nuk ka një reagim publik nga Policia e Shtetit, Raiffeisen Bank apo Banka e Shqipërisë lidhur me hetimin, ndërsa çështja pritet të zbardhë nëse bëhet fjalë për një sulm të organizuar kibernetik ndaj sistemit bankar apo për një abuzim të brendshëm me funksionimin e platformës elektronike./SHEKULLI
@NewsIn.Al
