E mbani mend Jozefinen?… jo këtë të sotmen, por atë zonjë që drejtonte me autoritet të plotë parlamentin shqiptar.
Sot çdo gjë ka ndryshuar. Xhozi që deri dje vetëm Berishën shikonte drejt në sy, është bërë një zonjë me profil europian. Zëri i saj është i ulët, fjalët janë të rrjedhshme, plot kuptim dhe të pasura. “Zhelet” kane vite që janë harruar… Zonja Jozefinë nuk shan më , ajo bën thirrje për urtësi!
Aq shumë ndryshoi zonja sa dhe Partine që krijoi e pagëzoi me veprimin që bëri “Levizja për ndryshim”…
Incidentet që ndodhën në Elbasan në Ditën e Verës midis simpatizantëve të dy partive të mëdha u dënuan dhe nga zonja Topalli. Ajo është shprehur kundër dhunës fizike dhe fjalorit banal duke aluduar në një ” strategji destabilizimi”
“Unë e shikoj si linjë konflikti. Ajo që ka ndodhur në Elbasan më ka shqetësuar dhe mendoj se kanë strategji destabilizimin e vendit ndoshta. Kam një bindje që të dyja palët kanë parë në sondazhet e tyre se nuk marrin votat e nevojshme për të krijuar qeveri. Nuk ke pse rrezikon destabilitetin e vendit për karrigen personale. Uroj që gjëja të mos shkojë deri në krijimin e një tjetër viti 1997”, u shpreh zonja Topalli.
Dje në Opinion, pothuajse në të gjitha pyetjet e Fevziut, tregoi një profil të tjetërsuar nga ai që kish ndërtuar për vite të tëra në majë të pushtetit. Tani që kanë mbetur më pak se një muaj e gjysëm nga 25 prilli, zonja Jozefinë bëri thirrje për qetësi dhe luftë pa kompromis kundrejt korrupsionit dhe varfërisë.
#I.Jano
