Vijojnë parreshtur konsideratat për Erdogan…
Trump paralajmëron një vendim që do ta bënte Turqinë “shumë të lumtur”
Presidenti i Shteteve të Bashkuara, Donald Trump, deklaroi se mund të ndërmarrë një hap që do ta bënte Turqinë “shumë të lumtur”, kur u pyet për kërkesën e Ankarasë lidhur me avionët luftarakë F-35 dhe motorët e avionëve.
I pyetur nëse do të udhëtonte drejt Turqisë “me një çantë të madhe dhuratash”, Trump vuri në dukje rëndësinë e rolit të Turqisë në NATO.
“Shikoni, ai është anëtar i NATO-s. Disa njerëz nuk e konsiderojnë të tillë, por ai është. Është një anëtar i fortë i NATO-s”, tha Trump gjatë takimit me Sekretarin e Përgjithshëm të NATO-s, Mark Rutte, në Shtëpinë e Bardhë.
“Po, ndoshta do të bëj diçka që do ta bëjë atë shumë të lumtur”, shtoi ai.
Turqia po përgatitet të mirëpresë liderët e NATO-s në samitin që do të mbahet në Ankara më 7-8 korrik 2026.
Nga ana e tij, Rutte theksoi se Turqia zotëron një industri të madhe të mbrojtjes.
Trump iu përgjigj duke thënë: “Njerëzit nuk e dinë sa e madhe është Turqia në aspektin ushtarak. Është shumë e fuqishme. Ata kanë shumë nga pajisjet tona dhe një ushtri shumë të fortë, falë tij (Erdoganit).”
Presidenti amerikan shtoi se, nëse samiti nuk do të zhvillohej në Turqi dhe nën mikpritjen e Presidentit Erdogan, “nuk mendoj se do të kisha shkuar”.
“Po shkoj për respekt ndaj Presidentit Erdogan”, tha Trump.
@NewsIn.Al
