Personalisht do ti propozoj Dhomës së Avokatëve të Shqipërisë që për përfundimin e bojkotit, të kërkoj plotësimin e kushteve në vijim. Ftohen të gjithë kolegët të propozojnë shtesa.
Ruat mundus, vincat advocatus – Edhe nëse bota shembet, avokati le të fitojë!
Jordani
KUSHTET PËR PËRFUNDIMIN E BOJKOTIT TË PËRGJITHSHËM TË AVOKATËVE
I. Konteksti dhe qëllimi
Në kushtet e një krize të thellë të drejtësisë në Shqipëri, të shoqëruar nga një klimë armiqësore ndaj avokatëve dhe raste alarmante të cenimit të sigurisë personale dhe profesionale të tyre, komuniteti i avokatëve kërkon që pushtetet e shtetit të ndërmarrin masa të menjëhershme dhe të detyrueshme për mbrojtjen e profesionit të avokatit dhe garantimin e rolit të tij kushtetues si shtyllë e sistemit të drejtësisë.
Ngjarje si vrasja tragjike e gjyqtarit, arrestimet selektive, sulmet mediatike dhe institucionale ndaj avokatëve dhe heshtja e institucioneve përgjegjëse tregojnë se reforma në drejtësi ka dështuar në garantimin e pavarësisë së profesionistëve të drejtësisë dhe sidomos të avokatëve — të cilët mbeten sot pjesa më e pambrojtur e sistemit.
Në përputhje me:
• Konventën Evropiane për të Drejtat e Njeriut,
• Parimet Bazë të Kombeve të Bashkuara për Rolin e Avokatëve (Havana, 1990),
• Rekomandimin CM/Rec(2019)1 të Komitetit të Ministrave të Këshillit të Evropës për Profesionin e Avokatit, dhe
• Konventën e re të Këshillit të Evropës për Mbrojtjen e Profesionit të Avokatit (CETS Nr. 226, Luksemburg, 13 maj 2025),
Dhoma e Avokatëve të Shqipërisë duhet të kërkoj urgjent plotësimin e kushteve minimale për përfundimin e bojkotit të përgjithshëm të avokatëve në Shqipëri, si vijojnë
II. Parimet themelore
1. Pavarësia e avokatit është element thelbësor i shtetit të së drejtës dhe parakusht për një proces të rregullt ligjor.
2. Avokati është garant i drejtësisë, jo palë politike apo administrative.
3. Çdo cenim, intimidim, ndëshkim apo diskriminim ndaj avokatit për shkak të ushtrimit të profesionit të tij përbën shkelje të nenit 6 dhe 10 të KEDNJ-së dhe të standardeve të Këshillit të Evropës.
4. Shteti shqiptar ka detyrimin pozitiv për të krijuar një mjedis të sigurt, të respektueshëm dhe efektiv për ushtrimin e profesionit të avokatit.
III. KUSHTET KONKRETE PËR PËRFUNDIMIN E BOJKOTIT
1. Ratifikimi dhe zbatimi i menjëhershëm i Konventës për Mbrojtjen e Profesionit të Avokatit (CETS Nr. 226)
• Qeveria dhe Kuvendi i Shqipërisë duhet të nënshkruajnë dhe ratifikojnë pa vonesë Konventën e Këshillit të Evropës për Mbrojtjen e Profesionit të Avokatit, duke e bërë pjesë të detyrueshme të legjislacionit të brendshëm, sipas nenit 122 të Kushtetutës.
• Zbatimi duhet të nisë menjëherë, pavarësisht numrit minimal të shteteve ratifikuese për hyrjen në fuqi ndërkombëtare të saj.
• Ministria e Drejtësisë të përgatisë plan veprimi për implementimin e dispozitave të Konventës në të gjitha nivelet e sistemit gjyqësor brenda jo më shumë sd 6 muajve.
2. Siguria fizike dhe profesionale e avokatëve
• Ministria e Brendshme dhe Policia e Shtetit të garantojnë mbrojtje të posaçme fizike për avokatët që përfaqësojnë çështje sensitive njëlloj si për gjyqtarët dhe prokurorët kur ju kanoset jeta. Mbrojtja e jetës së avokatit është detyrim i njëllojtë.
• Çdo rast kërcënimi ose dhune ndaj avokatëve të hetohet me transparencë publike dhe ndjekje penale sipas ligjit.
3. Infrastruktura e veçantë për avokatët
• Në çdo gjykatë dhe prokurori të krijohen hyrje të dedikuara për avokatët, me sistem sigurie dhe identifikimi të posaçëm.
• Të garantohet një ambient i veçantë pune për avokatët, për përgatitje dosjesh dhe takime me klientët, në përputhje me standardet e BE-së.
• Në rastet e mungesës së këtyre ambienteve, seancat të mos zhvillohen deri në sigurimin e kushteve minimale.
4. Udhëzim i përbashkët KLGJ–KLP–Dhoma e Avokatëve të Shqipërisë
• Të miratohet udhëzim i përbashkët detyrues që:
• Ndryshon mënyrën e trajtimit të avokatëve në gjykata e prokurori;
• Ndërpret praktikën e pritjes në sportele apo ambiente publike;
• Detyron autoritetet të krijojnë shërbim të dedikuar vetëm për avokatët (p.sh. “Zyra e Avokatit”).
. Kopja e akteve për avokatin të vihet në dispozicion nga prokuroria njëlloj dhe njëkohësisht me gjykatën
5. Ndalimi absolut i gjykimeve nëpër zyra
• Çdo gjykim që zhvillohet jashtë sallës zyrtare të gjyqit është proceduralisht i pavlefshëm.
• KLGJ të miratojë menjëherë një rregullore disiplinore që parashikon përgjegjësi për gjyqtarët që e shkelin këtë ndalim.
6. Regjistrimi i detyrueshëm video dhe me zë i çdo veprimi hetimor ndaj avokatëve
• Çdo veprim procedural ndaj një avokati të regjistrohet me video dhe audio; në mungesë të regjistrimit, akti është absolutisht i pavlefshëm.
• Kjo masë bazohet në parimin e transparencës dhe parandalimit të abuzimeve me pozitën e hetuesit apo prokurorit.
7. Ndryshime ligjore për forcimin e statusit të avokatit
Të ndërmerren menjëherë ndryshime ligjore në:
• Ligjin nr. 55/2018 “Për Avokatinë”, për të sanksionuar:
• imunitet funksional gjatë ushtrimit të profesionit ( më e pakta në Sallë të Gjyqit);
• detyrimin e autoriteteve për respekt dhe bashkëpunim me avokatin;
• ndalimin e ndalimit apo arrestimit të avokatit pa njoftim të menjëhershëm të Dhomës së Avokatisë.
• të rishikohet Kodi Penal për të shtuar si vepër të veçantë penale: “Pengimi i ushtrimit të profesionit të avokatit”.
8. Rishikimi i listave të avokatëve të caktuar kryesisht
• Listat e avokatëve kryesisht të rishikohen në mënyrë tërësore nga Dhoma e Avokatëve të Shqipërisë, për të shmangur përdorimin e tyre si instrument për legjitimimin e procedurave të paligjshme apo thyerjen e vendimeve kolektive të bojkotit.
• Të vendoset ndalim i përkohshëm për çdo avokat që pranon të përfaqësojë në kundërshtim me vendimin e bojkotit.
9. Mekanizëm disiplinor për respektimin e vendimeve të bojkotit
• Pranë çdo gjykate të vendoset përfaqësues i Dhomës së Avokatisë për të monitoruar zbatimin e bojkotit dhe për të raportuar çdo shkelje.
• Shkelja e bojkotit të trajtohet si shkelje e rëndë etike, që sjell masa disiplinore dhe përjashtim nga ushtrimi i profesionit për një periudhë të caktuar.
10. Masa ndaj zyrtarëve përgjegjës për klimën armiqësore
• Të kërkohet pezullimi i menjëhershëm dhe ndjekja penale e çdo gjyqtari, prokurori, apo oficeri të policisë gjyqësore që ka kontribuar në cenimin e të drejtave të avokatëve.
• Bojkoti të vazhdojë deri në realizimin e këtyre masave konkrete, pa afat të paracaktuar.
IV. Përfundim: Nga bojkot në reformë reale
Ky bojkot nuk është një akt rebelimi, por një akt institucional vetëmbrojtjeje i profesionit të avokatit, në një sistem ku:
• Avokati është trajtuar si palë e dobët, jo si garant i procesit të drejtë;
• Drejtësia është shndërruar në mekanizëm formal pa substancë ligjore;
• Reforma ka dështuar në misionin e saj themelor — për të krijuar një drejtësi të pavarur, efektive dhe humane.
Avokatia shqiptare kërkon një rishpërndarje të balancës së pushtetit në sistemin e drejtësisë, ku zëri i saj të dëgjohet si palë i e barabartë dhe jo si subjekt i nënshtruar.
Kjo është vija e kuqe e dinjitetit profesional dhe themeli i çdo shteti që pretendon të jetë demokratik.
@NewsIn.Al
