Kjo kubeja e bukur gjendet veç në Korçë. Dhe nuk i përket ndonjë institucioni kulturor apo fetar. Është shtëpia e dr Polenës,kirurgut me nam që njihet sa Karl Gega inxhinieri që projektoi tunele dhe hekurudha malore në Austri. Doktor Polena siç duket donte të ishte i pari jo vetëm në mjekësi,por dhe në arkitekturë. Ndaj ndërtoi shtëpinë e tij pallat që kur lexonim përralla me kështjella me 40 dhoma në përfytyrim na dilte ky art.
Sa isha i vogël kaloja shpesh atje se në këtë kube,bash në majë,banonte lejleku i përvitshëm. Ardhja e tij ishte si zilja e orës,lajmëronte pranverën.
Ndër vite qyteti u zgjerua. U rrit popullsia. U ndërtuan plot vila. Por kubeja ngeli më e larta. Qysh atje lejleku shihte Moravën,Qarrin,Malin Ivan dhe Ostrovicën. Ajo majë u bë kufiri i lartësisë,pika që nuk duhej kaluar.
Nuk di në vjen më lejleku te ajo kube. Por brezi im atë vend me harqe e njeh si shtëpia e shtegtarit këmbëhollë,por dhe si zyrë urbanistike. Ku u vendos që Korça do shtrihej,do zgjerohej,por nuk do klithte në lartësi. Çatia Polena është Himalaja e Korçës. Të tjerat më poshtë si bijat e kësaj ndértese të hijshme dhe hijerëndë.
Edhe në ëndérr më del ky pallat. Sa prapa ka rrëshqitur vendi. Sot ndértime të tilla nuk i bën dot kush. Se duhet para e madhe. Keqardhje,më të pasur paskemi qënë.
Do ikin vitet dhe disa gjëra Korça do i ketë unike. Mësonjëtoren dhe vilën Polena. Askund në Evropë s’e gjen. Nga që evropianë të vértetë si Polena banuan në Korçë.
Agim Xhafka
@NewsIn.Al
