Mëso, kërko, lexo, provo
Ëndërrat mund të djegin ëndrra,
Por zjarri, zjarrin nuk e djeg,
Ashtu dhe fryma brenda shpirtit,
Të çon në dritë ose në terr!
Nëse kupton ç’ke brenda teje,
Se sa fuqi dhe aftësi,
Ta dish se je “qenie qiellore”,
Nuk je veç trup, nuk je “njeri”!
Harro vetveten për një çast,
Harro të tjerët përreth teje,
Mëso, kërko, lexo, provo…,
Vepro, dëgjo, dhe mos merr leje!
Atëherë do të jesh njeri i lirë,
Do të gjejnë të tjerë që të ngjasojnë,
Ka shumë që duken si “shpellarë”,
Por dinë vërtet të dashurojnë!
Petro Arben Trebicka
@NewsIn.Al
