Plevris nga Selaniku: “50 mijë grekë nuk mund të zëvendësohen me 50 mijë pakistanezë apo bangladeshas”
Ministri grek i Emigracionit dhe Azilit, Thanos Plevris, nga Selaniku riktheu në qendër të debatit politik grek çështjen e emigracionit dhe politikën e kthimeve.
Në fjalimin e tij në Expo Thessaloniki, Plevris bëri një pasqyrë të situatës së emigracionit në Greqi dhe theksoi se qeveria greke mbetet e vendosur në zbatimin e një politike të ashpër për menaxhimin, kontrollin dhe pengimin e hyrjeve të parregullta të emigrantëve dhe refugjatëve.
Duke iu referuar politikave të shpallura që prej vitit 2019, ministri vuri theksin tek menaxhimi i flukseve, parandalimi i hyrjeve të parregullta dhe kthimi i personave që nuk kanë të drejtë qëndrimi apo mbrojtjeje ndërkombëtare.
Por deklarata që tërhoqi më shumë vëmendjen ishte ajo që lidhej me përbërjen demografike dhe emigracionin.
Plevris deklaroi se, sipas tij, “50 mijë grekë nuk mund të zëvendësohen me 50 mijë pakistanezë apo bangladeshas”, duke kundërshtuar idenë se emigracioni mund të përdoret si zgjidhje automatike për problemin demografik të Greqisë.
Sipas ministrit, çështja nuk mund të trajtohet vetëm me numra të fuqisë punëtore. Ai e lidhi atë me demografinë, integrimin, shtetësinë dhe identitetin e shoqërisë greke, duke bërë të qartë se qeveria nuk synon një politikë të pakontrolluar zëvendësimi të popullsisë.
NGA GREQIA TEK EUROPA
Plevris vuri gjithashtu në dukje se politika greke e emigracionit nuk kufizohet më vetëm brenda kufijve të Greqisë.
Sipas tij, linja që Athina ka ndjekur prej vitesh është reflektuar gjithnjë e më shumë në politikat europiane, ndërsa BE-ja po forcon mekanizmat për kontrollin e kufijve, kthimet dhe menaxhimin e personave që nuk kanë të drejtë të qëndrojnë në territorin europian.
Në këtë kuadër, ministri përmendi edhe bashkëpunimin me vende të tjera europiane për krijimin e qendrave të kthimit në vende të treta, përfshirë vende jashtë territorit europian.
Ideja është që personat që nuk përfitojnë azil ose një status të ligjshëm qëndrimi të mos mbeten për një kohë të pacaktuar në Europë, por të përballen me procedurat e kthimit në përputhje me vendimet e autoriteteve.
“DO TA VAZHDOJMË ASHPËRSIMIN E POLITIKËS”
Mesazhi i Plevrisit nga Selaniku ishte i qartë: Greqia nuk ka ndërmend të zbusë politikën e saj ndaj emigracionit të parregullt.
Ministri deklaroi se qeveria do të vazhdojë të kthejë emigrantët dhe refugjatët të cilëve u është refuzuar kërkesa për azil ose që nuk plotësojnë kushtet për leje qëndrimi.
Kjo qasje tregon se emigracioni mbetet një nga çështjet më të forta të politikës së qeverisë greke, në një kohë kur vendet europiane po përpiqen të gjejnë një ekuilibër mes nevojës për fuqi punëtore, plakjes së popullsisë, kontrollit të kufijve dhe detyrimeve për mbrojtjen e refugjatëve.
Nga Selaniku, Plevris dërgoi kështu një mesazh të drejtpërdrejtë: më shumë kontroll, më shumë kthime dhe një politikë emigracioni që, sipas qeverisë greke, duhet të përcaktohet nga interesat demografike dhe sociale të Greqisë.(Albania TV)
@NewsIn.Al
