Me valën e paprecedentë të të nxehtit që godet Evropën më fort se verërat e tjera në vitet e fundit, Konfederata e Sindikatave Evropiane po bën thirrje për miratimin e një ligji që do të vendoste një kufi të temperaturës për punën në natyrë në Kontinentin e Vjetër. Qëllimi është mbrojtja e punëtorëve .
Ndërhyrja e sindikatave europiane vjen teksa Spanja, një nga vendet e goditur rëndë nga dy valët e fundit të të nxehtit, regjistroi vdekjen e dy punëtorëve!
“Dy punëtorë vdiqën për shkak të vapës në Spanjë javën e kaluar. Në Francë, një vend ku nuk ka kufi të temperaturës për punë, 12 njerëz vdiqën për shkak të aksidenteve të lidhura me nxehtësinë në vitin 2020”, thuhet në një deklaratë të Konfederatës së Sindikatave Evropiane.
Numri u rrit të enjten në Spanjë, pasi shërbimet e ndihmës së parë në rajonin e Madridit njoftuan vdekjen e një punëtori që shpërndante fletëpalosje në kutitë postare për shkak të goditjes nga nxehtësia.
“Në të gjithë Bashkimin Evropian, 23% e punëtorëve janë të ekspozuar ndaj temperaturave të larta për të paktën një të katërtën” e kohës së tyre të punës, duke u rritur në 36% në bujqësi dhe industri dhe 38% në ndërtim, sipas të dhënave nga instituti kërkimor Eurofound.
Megjithatë, “vetëm një pjesë e vogël e vendeve në Evropë kanë legjislacion të krijuar për të mbrojtur punëtorët gjatë valëve të të nxehtit” dhe ka “ndryshime të gjera” nga një shtet në tjetrin.
Sipas sindikatave që i përkasin Konfederatës Evropiane të Sindikatave, punëtorët belgë të punësuar në punë të vështira fizike nuk duhet të punojnë kur temperatura i kalon 22°C. Kufiri është 5 gradë Celsius më shumë për të njëjtat lloje të punës në Hungari, ndërsa në Slloveni kufiri është 28 gradë Celsius në të gjitha vendet e punës.
Sipas Organizatës Botërore të Shëndetësisë, temperatura ideale për punë varion nga 16 deri në 24° Celsius.
“Punonjësit janë çdo ditë në vijën e parë të krizës klimatike, ata kanë nevojë për masat e duhura mbrojtëse”, paralajmëron zëvendëssekretari i përgjithshëm i Konfederatës së Sindikatave Evropiane, Claes-Michael Stahl.
“Kushtet meteorologjike nuk respektojnë kufijtë kombëtarë. Kjo është arsyeja pse ne kemi nevojë për legjislacion në mbarë Evropën për temperaturat maksimale të punës”, shton ai, sipas njoftimit.
Valët e të nxehtit që goditën Evropën Perëndimore në mes të korrikut vranë më shumë se 500 njerëz në Spanjë, ndërsa thyen rekordet e temperaturës në Francë, Mbretërinë e Bashkuar dhe Danimarkë.
Përhapja e valëve të të nxehtit është pasojë e drejtpërdrejtë e krizës klimatike, sipas shkencëtarëve, pasi emetimet e gazeve serrë rrisin intensitetin, kohëzgjatjen dhe frekuencën e tyre.(NewsIt)
@NewsIn.Al
